عجبي !! مايو 26, 2008

مع ان كل الخلق من اصل طين

وكلهم بينزلوا مغمضين

بعد الدقايق وشهور والسنين

تلاقي ناس اشرار وناس طيبين

عجبي !!

جالك أوان ووقفت موقف وجود

ياتجود بده ياقلبي يابده تجود

ماحد يقدر يبقى على كل شئ

مع ان عجبي كل شئ موجود

عجبي !!

الدنيا أوده كبير للانتظار

فيها ابن ادم زيه زي الحمار

الهم واحد ..والملل مشترك

ومفيش حمار بيحاول الانتحار

عجبي !!

شاف الطبيب جرحي وصف له الامل

وعطاني منه مقام يادوب مااندمل

مجروح جديد ياطبيب وجرحي لهيب

ودواك فرغ مني..وايه العمل

وعجبي!!

خرج ابن ادم م العدم قلت :ياه

رجع ابن ادم للعدم قلت : ياه

تراب بيحيا ..وحى بيصير تراب

الاصل هو الموت والا الحياة ؟

عجبي !!